زي النهاردة :)

زي النهاردة من سنة كان يوم السبت 16\7\2011 كان يوم تحليل الحمل بتاعي اللي عرفت فيه اني اخيرا حلمي هيتحقق وهبقى أم باذن الله
مش قادرة اوصف فرحتي اليوم ده كانت عاملة ازاي ولا فرحة الناس اللي حواليا عمري في حياتي ما هنسى اليوم ده ابدا يارب ما تحرم حد ابدا من الفرحة دي :)

انت غبي

دايما الأهالي بتفتكر انها لما بتأكل ولادها اكل كويس وبتشربهم والولاد نضاف وكويسين وبيدرسوا في مدارس غالية يبقى خلاص كده هما عملوا اللي عليهم وبينسوا الاهم من كل ده وهو بناء الشخصية دايما تلاقي الاب او الام يقولوا للطفل انت غبي او مبتعرفش تتصرف او يجوا حتى قدام الناس يقولوا ده غبي ده بيتكسف ده مش بيذاكر كويس ده مش بيسمع الكلام والحاجات اللي دايما الاباء والامهات بيقعدوا يرغوا فيها مع الناس قصاد ولادهم وناسيين ان هما كده بيساهموا في تشكيل شخصية اولادهم وانهم كده بيزرعوا فيهم الصفة اللي بينعتوه بيها لان الطفل بمنتهى البساطة صفحة بيضة احنا اللي بنشكلها وان الابناء بياخدوا كلام اهاليهم ثقة لاننا مصدر معلوماتهم الاول فبالتبعة احنا لما نقولهم كده هما هيصدقوا الكلام ده وهيفضل جواهم طول العمر بيتعاملوا على اساسه حتى لو جه الطفل يفكر يعمل العكس هيلاقي عقله الباطن بيقولوا لا بابا قال كذا يبقى انا كده لانه بيتعامل مع كلام ماما او بابا بمنتهى الثقة والصدق

عشان كده رجاااااااااء خاص ابنوا شخصية ولادكوا صح وبلاش التربية بالفهلوة لا لازم نقرا كويس عن تربية الأبناء ونقرا عن التربية من الناحية الدينية والنفسية والاحتماعية عشان نقدر فعلا نبني شخصيات متميزة ومستقلة وتكون فعالة لنفسها ولمجتمعها في المستقبل باذن الله

ما بعد الولادة (2)

بعد الولادة الست بتفتكر انه خلاص اخيرا هترتاح بقى من تعب 9 شهوووووور حمل وتقل وكتمة نفس ووجع وبعديها كمان تعب وارهاق الولادة سواء اكنت طبيعية او قيصرية فكلا الحالتين الولادة متعبة جدا
لكن الحقيقة انها بتكتشف العكس تماما وان هيبدأ تعب من نوع تاني خالص  ومسئولية كبيرة جدا وحمل تقيل بتلاقي فيه طفل كائن صغير وضعيف و هي مسئولة عنه في كل شيء وفي كل التفاصيل الصغيرة قبل الكبيرة وطبعا ده بيكون ارهاق شديد جدا ده غير كمان قلة النوم وباقي تعب الولادة اللي بتكون  لسه متخلصتش منه عشان كده فيه ناس كتير جدا بيجيلها اكتئاب ما بعد الولادة وممكن يستمر لمدة طويلة واوقات بتكون تطوراته فعلا خطيرة زي ان الأم تأذي ابنها او تأذي نفسها

عشان كده انا بشوف انه لازم يكون فيه حد معانا خصوصا في الفترة الاولى من الولادة ومش عيب ابدا اننا نطلب المساعدة من اي حد سواء من والدتك او صديقتك او جارتك او اي حد ترتاحي معاه وممكن يقدم لك المساعدة باخلاص

كمان لازم تهتمي بنفسك جدا الفترة دي في الاكل والنوم وكمان تهتمي بمظهرك لان اوقات بنحس اننا طالما خلفنا يبقى خلاص بقى راحت علينا وكله للنونو الجديد وده برضه بيأثر في نفسيتنا بالسلب طبعا ده غير بقى وزننا الزايد وشكلنا المترهل ووشنا المصفر والتعبان من الحمل والولادة عشان كده اوعي تفقدي الثقة في نفسك ابدا وحاولي تعملي اي تغيير ولو بسيط بس يغير من نفسيتك زي مثلا انك تنزلي تشتري لبس جديد مناسب لوزنك الجديد او مثلا تغيري من قصة شعرك او لونه
ممكن تدبري خروجة حلوة مع اصحابك ويكون فيه حد في الوقت ياخد باله من البيبي بحيث انك تستمتعي وتقضي وقت حلو مع اصحابك  تقري متاب بيريح اعصابك تدخلي اوضتك وتقفلي عليكي وتسمعي موسيقى هادية بتريحك تاكلي نوع شيكولاتة بتحبيها اي حاجة المهم تدوري على اي حاجة مهما كانت صيرة تبسطك وتعمليها ودلعي نفسك واوعي تتكسفي من كده مش معنى انك بقيتي ماما يبقى خلاص تنسي نفسك لا بالعكس ابدأي مرحلة جديدة من الاستمتاع والاهتمام بنفسك عشان ده هينعكس عليكي وعلى حياتك وبالتبعية على البيبي بتاعك :)

اجابته أضحكت زملاؤه وأبكت المعلم

كل واحد يقولي ايش وده يطلع لما يكبر؟؟
اللي قال .. طيار .. طبيب .. شرطي ..كلهم إجابتهم كانت تدور حول ذلك..
إلا واحد منهم قال شيء غريب ..وضحك منه التلاميذ ...
هل تعلم ماذا قال ؟؟
... ... .
.

قال : نفسي أكون صَحَاِبِيّْ ..

تعجب المعلم من التلميذ ..
قال ليش صَحَابِيّْ ؟

قال : ماما كل يوم قبل ما أنام تقولِّي قِصَّةَ صَحَابِيّْ ..
الصَّحَابِيّْ .. يُحِبُّ الله .. و بَطَلْ ..أَبِيْ أَطْلَعْ مِثْلُهْ..

سكت المعلم ..
يحاول منع دمعته من هذه الإجابة..
وَعَلِمَ أن خلف هذا الطفل أمَّاً عظيمة لذلك صار هدفه عظيماً..

قصة اخرى رائعة :
تقول إحدى معلمات الفنية .. في يوم من الأيام طلبت من إحدى الصفوف الإبتدائيّة
أن يرسموا : منظر الربيع ....

فجاءت تلميذة و قد رسمت مصحف
فتعجبت من رسمتها !!!!
فقلت :
إرسمي الربيع وليس مصحف الا تفهمين !!!
و گآنت إجابتها البريئة كصفعة على وجهي ، قالت :

القرآن ربيع قلبي هگذا علمتني أمي

سبحان الله ...
أي تربيه تلك .. وأي ام تلك التي اتقنت التربية

 

انا نقلاها من الفيس بوك بس حبيت انقلها هنا عشان ابقى افكر نفسي بيها كل شوية وادعي ربنا يجعلني ام صالحة

 

يارب اجعلنا أمهات صالحات يارب العالمين

ما بعد الولادة (1)

طبعا بعد الولادة كان عندي احاسيس مختلفة كتير اولا كنت تعبانة جدااا من الولادة القيصرية وجرحها وتعبه كان كل حاجة فيها صعوبة شديدة والحاجات البسيطة جدا اللي الواحد بيعملها بمنتهى البساطة كانت صعبة وقتها يعني عمري في حياتي ما اكنت اتخيل اني مقدرش اضحك لان الضحك بيوجعني جدا وبيتعبني مع اني دي حاجة كنت بعملها على طول بمنتهى البساطة وحتى بدون التفكير فيها
عمري ما تصورت اني معرفش اتقلب في السرير مثلا او حتى اعدل نفسي من غير ما حد يساعدني
كان بالنسبة لي حلم اني رجلي تطول الارض وانا قايمة من على السرير اول مرة بعد الولادة وكنت حاسة اني زي العيل الصغير اللي لسه بيتعلم المشي مش قادرة امشي كويس عشان ألم الجرح ومش قادرة امشي غير لما حد يسندني وكان بالنسبة لي منتهى النجاح اني مشيت عشر دقايق على بعض متواصل  وساعتها بس حسيت بنعمة ربنا عليا وان فيه حاجات البني ادم بيعملها كده عادي خالص لكن هي بالنسبة لناس تانية صعبة جدا ومؤلمة وبيتمنى انه يعملها زينا بس مش قادر وساعتها بس حسيت فعلا بكل مريض بيتألم وحواليه ناس بتقوله معلش واستحمل وهما فعلا مش حاسين بألمه ده وقلت يعني دي مجرد ولادة بتحصل كل ساعة وحاسة بكل التعب ده امال الناس اللي بتكون مريضة مرض مزمن ومؤلم يعملوا ايه حقيقي ربنا يجازيهم الجنة

كمان وقتها حسيت بمعنى ان ربنا معانا وقريب مننا وده الحاجة الوحيدة اللي بتصبر على الوجع وكنت بفتكر كل شوية ان الجنة تحت أقدام الأمهات ودي برضه كانت بتريحني جدا وبتخليني اقول الحمد لله انا مبسوطة وراضية بكل التعب ده

 حسيت كمان بقيمة الراحة لما كنت باخد حقنة مسكنة تخفف الوجع ياااااااااه قلت والله البني ادم ده في نعمة كبيرة مش حاسس بيها ابدا والبني ادم ده فعلا حاجة تافهة جدا وهو فاكر نفسه ياما هنا ياما هناك وهو في الحقيقة ممكن شوية الم بس يهدوه

وقت ما كان الوجع بيشد عليا كنت بدعي ربنا يرزق كل واحدة نفسها في الامومة وميحرمش حد ابدا من الاحساس ده وحسيت ان كمان  اي تعب في الدنيا مهما كان يهون مقابل اللحظة الدافية دي وحضن بنتي اللي مفيش زيه وكنت بقول الحمد لله انا فيه كتير غيري يتمنوا بس اللحظة بكل وجعها وتعبها وفرحتها وجمالها

اللهم لك الحمد على نعمة الأمومة

4\3\2012 أغلى يوم في حياتي

حبيت أول بوست اكتبه يكون عن أغلى يوم في حياتي يوم ولادة بنتي حلا كان يوم الأحد 4 مارس 2012 بعد انتظار تلات سنين ونص فاكرة اليوم كويس جداااا بكل تفاصيله الصغيرة والكبيرة قبلها بيوم كان عندي احاسيس متناقضة كنت متحمسة ومبسوطة جدا ومش مصدقة اني خلاص اخيرا هشوف بنتي اللي انتظرتها المدة الطويلة دي كلها وهشم ريحتها وهاخدها في حضني وفي نفس الوقت كان عندي احساس غريب جدا اني مش مصدقة انها هتنفصل بعد ما كانت بقالها 9 شهور جزء مني بتاكل معايا وبتشرب معايا بتحس بيا وبحس بحركتها  بتتفاعل معايا مكنتش قادرة اصدق ان خلاص بكرة هنبقى اتنين هتبقى هي كائن منفصل لوحده بعيد عني  وكنت حاسة اني زي ما اكون خايفة عليها من الدنيا الجديدة اللي هي هتدخلها ومكنتش قادرة بقى استوعب الاحساس والتناقض ده.

طبعا اليوم ده منمتش خالص وجه يوم الحد وصحينا بدري وكنت في المستشفى الساعة 9 الصبح كل التوتر بقى مسكني يومها اصل كنت أول مرة في حياتي أدخل عمليات فكنت قلقانة شوية بس الحمد لله عدت على خير

الساعة 10 دخلت العمليات وطبعا اخدت حقنة البنج وكنت في عالم تاني ومحستش غير ودكتور البنج بيمسك ايدي وبيطمن عليا

وسابوني شوية في غرفة الافاقة كنت مستعجلة جدا عايزة اشوف بنتي بسرعة ونفسي اخدها في حضني وابوسها

اول ما جابوها كنت بعد ما رحت اوضتي بشوية وفضلت ازن عليهم عشان يجيبوها اشوفها

فاكرة اول ما عيني وقعت عليها كانت لابسة السلوبيت الابيض في كحلي اللي كنت مختاراه عشان تلبسه في اول يوم ليها في الدنيا  وشكل اللفة اللي اخترتها تمشي مع الطقم بتاعها والفوطة اللبني اللي افتكروها لفة ولبسوها لها  المهم طلبت منهم يقربوها مني عشان احضنها وابوسها كنت بصراحة تعبانة جدا من الجرح ومكنتش قادرة اشيلها خالص بس كنت طايرة من الفرح وحسيت ان كل التعب راح خلاص مني مقابل الحضن الجميل ده والبوسة اللي على راسها

فاكرة كمان كنت ازاي مستنياها انا وجوزي تفتح عنيها بفارغ الصبر عشان نشوف عنيها وجوزي صورها اول ما فتحت عنيها عشان نسجل كل حاجة وكل لحظة بالصور

وساعتها قررنا خلاص نسميها حلا عشان هي اللي هتحلي دنيتنا كلها وعشان اتمنى ان ربنا يجعلها من اسمها نصيب ويحلي دنيتها كلها يارب